លោកជំទាវ គីម សុភ័ក្ត្រ ម៉ាង ស៊ីណេត អញ្ជើញចុះសំណេះសំណាល និងចែកសម្ភារសិក្សាជូនកុមារតូចនៅសាលាមត្តេយ្យសហគមន៍អូតាសេក ស្រុកស្ទឹងហាវ

នាព្រឹកថ្ងៃទី១២ ខែកក្កដា ឆ្នាំ២០២៦ លោកជំទាវ គីម សុភ័ក្ត្រ ម៉ាង ស៊ីណេត ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តព្រះសីហនុ បានអញ្ជើញដឹកនាំសមាជិកាសមាគមនារីខេត្ត ចុះសួរសុខទុក្ខ សំណេះសំណាល និងនាំយកសម្ភារសិក្សាមួយចំនួនទៅប្រគល់ជូនដល់កុមារតូចៗ ដែលកំពុងសិក្សានៅសាលាមត្តេយ្យសិក្សាសហគមន៍អូតាសេក ស្ថិតក្នុងឃុំទំនប់រលក ស្រុកស្ទឹងហាវ ខេត្តព្រះសីហនុ។

ក្នុងឱកាសដ៏ស្និទ្ធស្នាលនោះ លោកជំទាវ ប្រធានកិត្តិយសសាខាសមាគមនារីខេត្ត បានសម្តែងនូវក្តីស្រឡាញ់ ព្រមទាំងបានសាកសួរ ទុក្ខយ៉ាងយកចិត្តទុកដាក់ចំពោះជីវភាពរស់នៅ និងការសិក្សារបស់កុមារតូចៗទាំងអស់។ លោកជំទាវបានគូសបញ្ជាក់ថា ការអប់រំកុមារតូចនៅថ្នាក់មត្តេយ្យ គឺជាគ្រឹះយ៉ាងសំខាន់បំផុតក្នុងការកសាងធនធានមនុស្ស និងការអភិវឌ្ឍខួរក្បាលរបស់កុមារឱ្យមានសមត្ថភាព ស្មារតី និងកាយសម្បទារឹងមាំ ដើម្បីត្រៀមខ្លួនចូលរៀននៅកម្រិតបឋមសិក្សា។

បន្ថែមពីនេះ លោកជំទាវក៏បានថ្លែងអំណរគុណ និងកោតសរសើរដល់លោកគ្រូ អ្នកគ្រូ ព្រមទាំងអាជ្ញាធរដែនដី ដែលបានខិតខំប្រឹងប្រែងយកចិត្តទុកដាក់បីបាច់ថែរក្សា និងបណ្តុះបណ្តាលកុមារតូចៗនាពេលកន្លងមក។ ជាមួយគ្នានោះ លោកជំទាវបានលើកទឹកចិត្តឱ្យមាតាបិតា និងអាណាព្យាបាលទាំងអស់ បន្តយកចិត្តទុកដាក់លើការអប់រំ និងសុខភាពរបស់កូនៗឱ្យបានកាន់តែល្អប្រសើរ។

ជាកិច្ចបញ្ចប់ លោកជំទាវ និងសមាជិកាសមាគមនារី អមដំណើរ បានប្រគល់សម្ភារសិក្សា និងកាយវិការលើកទឹកចិត្តជូនដល់កុមារតូចៗដែលកំពុងសិក្សានៅសាលាមត្តេយ្យសហគមន៍អូតាសេកសរុបចំនួន ២៨នាក់ ប្រកបដោយបរិយាកាសរីករាយ និងស្និទ្ធស្នាលបំផុត។